رضــا نايف

rizanayif@gmail.com
هەڤدەنگى و ئێک هەلویستییا گەلێ مە دڤان چەند سالێت بوریدا ئامرازێ هەرە سەرەکى یێ پاراستنا دەستکەفت و بەرژەوەندیێن نیشتیمانى و موکومکرنا پلە و پایە و هێزا کوردى بویە دگۆرەپانا سیاسیا عێراقێ و رۆژهەلاتا ناڤین، کورد شیا ب ڤێ چەندێ ل عێراقا نوى رۆلەکێ کارا بگێریت و مافێت خو ییت رەوا دچارچوڤەیەکێ یاسایى و دەستوریدا رێکبێخیت و لایەنێت دژ نەچار بکەت ملکەجى خاست و ئیرادا گەلێ مە ببن،لێ ئەڤا بۆرى و بووى لئاست داخازیێت گەلێ مە نەبوویە و لقۆناغێت داهاتى پتر و دژوارتر ژ جاران دێ تووشى رکمانێت دوژمنکارانە یێت لایەنێت سیاسى ل عێراقى بین ،راستە دماوێ بوریدا ئەو رەوت و لایەن بەرامبەر بەرژەوەندیێت کوردى بێ دەنگ و بێ هەلوێست نەبووینە لێ ئێک هەلویستیا سەرکردایەتیا مە و گەلێ مە تاکە چەکێ کارا بویە بۆ بەرسینگ گرتنا وان دوژمنکارییان...پرۆسا هەلبژاردنێت داهاتى بۆ گەلێ مە گرنگترین و چارەنڤیس سازترین پرۆسا هەلبژاردنایە،برەنگەکى کو دکاودانەکێ هوسا یى

َهەستیاردا سەنگ و هێزا هەر لایەنەکى ددارشتن و برێڤەبرنا سیاسەتا عێراقێدا دیاردکەت .دیارە دپرۆسێت بوریدا لایەنێ کوردى شیا رێژەیەکا بەرچاڤ و ژهەژى بدەستڤە بینیت و هەبوونا خو برێکا بکارئینانا مافێ سیاسى و پەیرەوکرنا پرۆسێت دیموکراسى بۆ گەل و نەتەوێت هەرێمى و جیهانى بسەلمینیت.لێ لقۆناغێت داهاتى و ژ ئەنجامێ پەیدابوونا گهۆرینێت بلەز و هەبوونا ئازادییا پشکداریێ دچالاکیێت سیاسیدا ،زەمینە خوش بوویە کو هەر لایەنەک ب ئەوپەرى ئازادیڤە پشکداریێ دپرۆسا سیاسیدا بکەت وبشێت لگۆر سەنگا خو رێژەیەکێ ژ دەستهەلاتێ بدەستڤە بینیت ،نەخاسمە ئەڤرۆ تێگەه و بنەمایێ تەوافوقێ وەکو پێدڤییەکێ بۆ برێڤەچوون و مەشا  سیاسى ل عێراقێ بویە دیاردەیەکا زەق و بەرچاڤ و رەواجا خو هەیە.ئەڤ ئازادیا سیاسیا بەرچاڤا ئەڤرۆ بەرنامە و ئارمانجا گەلێ مە و رەوتێت دیموکراتخواز بویە،واتە ئەڤ ئازادییە ژ ئەنجامێ رەنج و خەبات و قوربانیدانەکا زۆر دەستەبەر بوویە...لێ دهندەک بیاڤاندا ئەڤ ئازادییە ژى دبیتە هۆکارێ پەیدا بوونا شک و گومانێ دپاشەرۆژا هەرێمێدا و چێدبیت ببیتە ئەگەرێ لاواز بوونا هێزا کوردى ل بەغدا،دڤیا دڤێ قۆناغا هەستیاردا ئەڤ ئازادییە نەببایە هۆکارێ لێک ترازان و پشکداریا جودا یا چەند پارت و لایەنەکێن سیاسى دهەلبژاردنێن جڤاتا نیشتیمانیا عێراقێدا ،ژبەرکو هێزا بەرچاڤا لایەنێ کوردى د ئێک دەنگى و ئێک هەلویستیێ دایە و فەر بو پارت و لایەنێت سیاسى یێن هەرێمێ پێ لبەرژەوەندیێن بەرتەنگێن تایبەت و حزبایەتى

 ناباو بەرژەوەندیێت نەتەوایەتى بەرچاڤ وەرگرتبانە و هەول و بزاڤ ژبۆ پاراستنا دەستکەفتان هاتبانە تەرخانکرن .بهەر حال خەمخوریا سەرۆکێ کوردستانێ و لهەڤ جەماندنا نوینەرێت تەڤ پارت و لایەنێت سیاسى یێت کوردستانى د رینشتنا تایبەت یا رۆژا(22/10/2009)ژبۆ گەرەنتى کرنا ئێک دەنگییا کوردستانییان لدۆر بابەتێت چارەنڤیس ساز و لێک نێزیک کرنا بیر و رایان بۆ بەرسینگ گرتنا هەر مەترسیەکا پشتى هەلبژاردنان زیانێ لبەرژەوەندیێن نەتەوایەتى و نیشتیمانى ددەن ،پێنگاڤەکا دى یا زێرین یا جەنابێ سەرۆکى بوویە...چنکو لهەلبژاردنێت بورى یێت جڤاتا نیشتیمانى عەرەبێت سوننە وەکو پێدڤى پشکدارى دهەلبژاردناندا نەکر و ژئالیەکێ دن ڤە ئێک لیستى یا کوردان و پەیرەوکرنا شێوازێ لیستا داخراو هۆکارێت سەرەکى بون کو لایەنێ کوردى رێژا هەرەباش یا کورسیێت جڤاتێ بدەستڤە بینیت،لێ ئەڤجارە لایەنێ سوننى دێ بهەمى هێزا خو پشکدار بیت و ئەڤ چەندە ژى دهەلبژاردنێت جڤاتێت پارێزگەهێت عێراقێ یێن پارسال بەرچاڤ بو

، ژئالیەکێ دیڤە پەیرەوکرنا شێوازێ لیستا ڤەکرى و دژایەتییا تەڤ ئالیێت عێراقى لدەمێ پەسندکرنا یاسایا هەلبژاردنان بۆ کێمکرنا کورسیێت هەرێمێ و رازیبونا لایەنێ کوردى لسەر وێ رێژا کێم یا کورسیان وهەروەسا  پەیدابوونا فرەلیستیێ ل هەرێما کوردستانێ ،چەند هۆکارەکن کو پێش بینى دهێتە کرن کورد نەشێت رێژا خو ژجاران زێدەتر بکەت ،ئەڤە وى واتاى نادەت کو رەشبین بین بەرامبەر ئەنجامێت هەلبژاردنێن داهاتى لێ زەنگەکە بۆ هشیارى و سەرەدەرییەکا ژیرانە دگەل هەلبژاردنان و ئەرکێ نیشتیمانى و نەتەوایەتییا هەر تاکەکییە ل هەرێما کوردستانێ ب پشکداریکرن دهەلبژاردنێت داهاتیدا بەرەڤانیێ ژ دەستکەفتان بکەت ،ئەگەر دهەلبژاردنێت ناڤخویێن هەرێما کوردستانێدا بەرنامێ کارێ پارت و لایەنێت پشکداردا پروپاگندا چاکسازى و بلندکرنا ئاستێ ژیار و خزمەتگوزارییان هاتبیتە کرن ،ئەڤرۆ لسەر ئاستێ عێراقێ بەرنامێ کارێ مە پرۆژەیەکێ نەتەوایەتى و پاراستنا دەستکەفت و بەرژەوەندیێت نەتەوایەتى و نیشتیمانیە .نەخاسمە دوژمنێت هەڤسوى و لایەنێت عێراقى دتەڤدا کۆکن لسەرلاوازکرن و دۆرپێچدانا دەستهەلاتا کوردى،بێ شک هەمى دوێ باوەرێدانە پرۆسا هەلبژاردنێت داهاتى ئێک ژ گرنگترین پرۆسایە و ئەنجامێت وێ چارەنڤیسێ سەنگا مە ل عێراقا پشتى هەلبژاردنان دەستنیشان دکەت...