(جەلیل زەنگەنە) ناوی تەواوی (جەلیل سەعید حەمید)ە،، لە ساڵی 1944 لە (شاترلو)ی شاری كەركوك لە دایك بووە. لە ساڵانی حەفتاكاندا چووەتە ناودنیای نووسین و شانۆ و درامای تەلەفزیۆنییەوە، ماوەی 40 ساڵە لەم بوارانەدا وەكو ئەكتەر و نووسەر و دەرهێنەر كاردەكات. وەكخۆی دەڵێت، لەبەرئەوەی ناوەكەی عەرەبی بووە، بۆ ئەوەی بزانرێ كە كوردە، زەنگەنەی بە ناوەكەیەوە كردووە. هونەرمەند گوتیشی " لە كەركوك لە بواری ئەدەبیات و هونەردا تا ساڵی 1975 كارمدەكرد، بەڵام لەبەرئەوەی من نەمدەویست لەگەڵ كەسانی ئەوكاتەی كەركوك كاربكەم، زۆر ئازاردرام، بۆیە كەركوكم بەجێهێشت و هاتمە سلێمانی و لێرە درێژەم بەكارەكانم و چالاكییەكانمدا، وەكو شانۆ و تەلەفزیۆن". پاشان جەلیل زەنگەنە تیشكی خستە سەر كارە درامیەكانی و گوتی " یەكێك لە كارە تەلەفزیۆنیەكانم درامای (ژیان) بوو، كە ئامادەكردن و سیناریۆ و دەرهێنانی خۆم بوو، كە لەگەڵ كۆمەڵەی هونەری وێژەی كوردی پێشكەشمان كرد. پاشان (پەروانە)، هەروەها لە ساڵی 1977 (نهێنی) كە لە زانكۆی سلێمانی بە بۆنەی رۆژی شانۆی جیهانییەوە پێشكەشم كرد، ئەوەش ئێش و ئازارێكی زۆری بۆ دروست كردم، لەبەرئەوەی (دائیرەی ئەمن)ی ئەو كاتە ئەمەیان پێناخۆش بوو، چونكە لەبەرژەوەندی ئەواندا نەبوو". دوای ئەوەش زەنگەنە لە چالاكییەكانی هەر بەردەوام بووە، وەك ئاماژەی پێدا، (شیرینو فەرهاد) و (ژاڵە) و چەندین كاری سەركەوتووی تری بەرهەمهێناوە. دەشڵێت " (گالیسكەی مەرگ)م لە ساڵی 1993 لەگەڵ هونەرمەند (جیهاد دڵپاك) بۆ تەلەفزیۆنی گەلی كوردستان بەرهەمهێنا، پاشان (خولە پیزە) كە نووسین و سیناریۆ و دەرهێنانی خۆم و بەرهەمهێنانی (مستەفا ئەحمەد) بوو، پێشكەشكرا. پاشان (مامە ریشە)و بەرهەمهێنا، كە بە هەمانشێوە نووسین و سیناریۆ و دەرهێنانی خۆم بوو. توانیمان خولە پیزە و مامە ریشە، لە فیستیڤاڵی سنە پێشكەش بكەین، پاشان لە لەندەن بۆ هەردوو فیلمەكە بانگهێشتكراین، دوا كاریشم (گەردەلول)بوو".

سەبارەت بەو هونەرمەند و ئەكتەرانەی لە گەردەلولدا بەشداربوون و ئێستا گلەییان لەخودی دەرهێنەر هەیە، لە رۆژنامەو گۆڤارەكاندا قسە دەكەن، زەنگەنە گوتی " بێگومان لە ئیشێكی گەورەدا كە ئیشێكی 200-300 كەسییە هەموویان وەكو یەك نابن، هەر كەسە رۆڵی خۆی بە پێی خۆیەتی، كەسێك كە تازە هاتووە، بێگومان وەكو هونەرمەندان (بەدیعە دارتاش، عومەر دڵپاك، جیهاد دڵپاك، گەزیزە) نابێت، من بایەخم بە گەنجێكی زۆردا و لەگەردەلول دەركەوتن. بێگومان لەگەڵ گوڵدا دڕكیش دەبێت، من گوێ بەوانە نادەم، چونكە ئەوەی ئەوان دەیڵێن، رەخنە نییە! رەخنەی زانیاری و زانستی و ئەكادیمی رەخنەن"، هونەرمەند گوتی " ئەوە گرنگە كە تاچەند گەردەلول توانی كاریگەری لەسەر ویژدانی بینەر هەبێت، گوزارشت لە ئێش و ئازارەكانیان بكات و بچێتە هەموو ماڵێكەوە، بۆیە خەڵكی بە عەشقەوە چاوەڕێی بەشی دووەم بوون، ئێستاش چاوەڕێی بەشی سێهەمن". زەنگەنە رایگەیاند، بەهۆی ئەو نەخۆشییەی لە ماوەكانی رابردوودا تووشی بوو، گەردەلولی 3 دواكەوت، بەڵام ئێستا دەستی پێكردووەتەوە و دوای جەژن دەست بە وێنەگرتنی دەكات. دووپاتیشیكردەوە، ئەگەر تووشی كێشە نەبن، گەردەلولی 3 جوانترو بەهێزتر و بەتواناتر دەبێت. گوتیشی " گەردەلولی 3، 65 زنجیرەی تێپەڕكردووە، هەر زنجیرەیەكیش 40 خولەكە".

جەلیل زەنگەنە لە بارەی 2 كچ و 2 كوڕەكەیەوە دەڵێت" ئەوان ئەو عەشق و خۆشەویستییەی منیان بۆ هونەر نییە، بەشدارییان كردووە و وازیانهێناوە. كچە گەورەكەم كە ئێستا مامۆستایە، لە ساڵی 1993 لە (كەژاوەی مەرگدا) بەشداریكرد، كچەكەی ترم كە یەكێك بوو لە منداڵەكانی حەمەتاڵ، جارێ بەردەوامە، نازانم سیناریۆكە دەوری دەداتێ یان نا". وەكو ئەوەی كە ماوە 40 ساڵە لەناو كاری هونەریدایە و لە بارەی ئەو گۆڕانكارییانەی لە هونەری درامای كوردیدا روویداوە زەنگەنە جەختیكردەوە، ئێستا هونەر بە قۆناغی جوان و باشدا دەڕوات، هەرچەندە قۆناغەكە سستە، بەڵام جیاوازی زۆری لەگەڵ دراماكانی جاراندا هەیە. گوتیشی " دراما بەپێی پێویست پێش نەكەوتووە، هونەرمەندان یارمەتی نەدراون، ئەگەر من مووچەی وەزیفیم نەبێت ناتوانم بژیم، چونكە بەهونەرەكەم ناژیم،تابتوانم هونەرەكەم بكەم بە پیشە. هونەر لەم وڵاتەدا تەنها هیوایەتە و نەبووەتە پیشە، ئەمەش یەكێكە لە هۆكارەكانی دواكەوتنی هونەری درامای كوردی، كە لێپرسراوەكان و حكومەت بەداخەوە تائێستا لە گرنگی هونەر ناگەن، كە هونەر چەند ترسناك و گرنگە". هونەرمەند پێیوایە، لە رێگەی هونەرەوە دەتوانین پێناسە و كلتووری میللەتی خۆمان بە دنیا بناسێنین، دەشڵێت " ئێستا وڵاتانی هیند و میسر لەسەر هونەر دەژین، ئەمریكا زۆربەی فیكرەكان كە بە دنیادا بڵاوی دەكاتەوە، مەسەلەی سینەمایە، بەڵام لای ئێمە ئەو گرنگییەی نەدراوەتێ، بۆیە بە ئاسانی پێشوازی لە دراما بێگانەكان دەكەین، كە زیانی زۆرە بۆ ئێمە، لە رووی فۆلكلۆر و كلتووری ئێمەوە دوورن، بەڵام ئێمە لە بۆشاییدا دەژین، ئەگەر خۆمان درامامان نەبێت میللەت چی بكات، بۆیە ناچار درامای بێگانە پیشانی خەڵك دەدەن، دراماكانی خۆمان بەداخەوە زۆربەی زۆری سواوەو لەئاستی زەوقی بینەردا نییە". جەلیل زەنگەنە روونیكردەوە، هەندێك بەرنامە لەچەند كەناڵێكماندا كراوەتەوە، هەمووی وەرگرتنە لە بەرنامەی بیانییەوە، كە ئەوان 500 ساڵیان بەسەر ئێمەدا تێپەڕاندووە و لە شارستانێتدا لەگەڵ ئێمە جیاوازن، گوتیشی " ئێمە لەو بەرنامانەدا هەست بە نامۆیی خۆمان دەكەین، هەندێك پێشكەشكاری ئافرەت هەیە وادەزانن بە رووتی و بەدەرخستنی هەندێك بەشی لەشیان، دەتوانن شتی جوان بكەن. نەخێر بەپێچەوانەوە، جوانی، جوانی رۆحە، جوانی بەرنامە و عەقڵە، جوانی ئەو شتانەیە كە پێشكەش دەكرێت، نەك ئافرەتێك دابنرێت بەس بۆ سەیركردنی كاڵا و باڵای، بۆئەوەی خەڵك زەوقی لێ وەرگرێت، وادەزانن ئەجنەبی و وڵاتە عەرەبییەكانن، نەخێر ئەوان پێشكەوتوون، ئەوان لە هەموو شتێك بوونەتەوە و پێناسە و دەوڵەتی خۆیان هەیە، بۆیە ئەم كۆپی كردنی بەرنامانە ئەگەر لێی نەزانیت و نەزانی چۆن سوودی لێ وەربگریت، زیانی زۆر زۆرە، ئەمە خەنجەرێكی ژەهراوییە و لە میللەتەكەمان دەدرێت".