سه‌رۆكی هه‌رێمی كوردستان پێشوازی له‌ سه‌رۆكی فراكسیۆنی ئه‌لئێراقیه‌ ده‌كات

ئێواره‌ی ئه‌مڕۆ چوارشه‌ممه‌ به‌ڕێز مسعود بارزانی سه‌رۆكی هه‌رێمی كوردستان له‌ سه‌لاحه‌ددین پێشوازیكرد له‌ د.ئه‌یاد عه‌للاوی سه‌رۆكی فراكسیۆنی ئه‌لئێراقیه‌ و ئه‌مینداری گشتی بزووتنه‌وه‌ی ویفاقی نیشتمانی و شاندێكی هاوڕێی. 

له‌ دیدارێكدا گفتوگۆ كرا ده‌رباره‌ی ئه‌و رووداوانه‌ی ئێستا كه‌ وڵات به‌خۆیه‌وه‌ ده‌بینێ. 

سه‌رۆك بارزانی پێویستی په‌نابردنه‌ به‌ر گفتوگۆی سیاسی بۆ چاره‌سه‌ركردنی كێشه‌ و مه‌سه‌له‌ هه‌ڵپه‌سێردراوه‌كان دووپاتكرده‌وه‌ كه‌ له‌ پێناوی ئه‌وه‌دا هه‌وڵبده‌ن بارودۆخه‌كه‌ له‌وه‌ زیاتر ئاڵۆز نه‌بێت و كار بكه‌ن بۆ هێوركردنه‌وه‌ی بارودۆخه‌كه‌ و رزگاركردنی وڵات له‌و قه‌یرانه‌ی كه‌ دووچاری بۆته‌وه‌.

له‌مباره‌یه‌وه‌ تیشك خرایه‌ سه‌ر ورده‌كاری ئه‌و كۆنگره‌ نیشتمانییه‌ فره‌وانه‌ی كه‌ بڕیاروایه‌ له‌ ده‌رفه‌تێكدا ببه‌سترێ له‌رووی چۆنیه‌تی سازدانی ئه‌و بنه‌مایانه‌ی كه‌ پشتیان پێ ده‌به‌سترێ. 

هه‌ر له‌ دیداره‌كه‌دا بڕیاردرا بۆ ئه‌م مه‌به‌سته په‌یوه‌ندی و وتووێژی نێوان هه‌ردوولا سه‌باره‌ت به‌ ئاماده‌كاری كۆنگره‌كه‌ به‌رده‌وام بێت.‌