ئه‌ردۆغان: له‌ سووريا خه‌نجه‌ر له‌ دڵى تيرۆر ده‌چه‌قێنين

Decrease font Enlarge font قەبارەی فۆنت
image

سه‌رۆكى كۆمارى توركيا ره‌جه‌ب ته‌يب ئه‌ردۆغان رايگه‌ياند، وڵاته‌كه‌ى ئاماده‌يى هه‌يه‌ ئۆپراسيۆنى سه‌ربازى سوپا له‌ ناوچه‌كانى باكوورى سووريا فراوان بكات.

ئه‌مڕۆ شه‌ممه‌ 5ى ئاب/ ئۆگستى 2017، سه‌رۆكى توركيا له‌ وته‌يه‌كدا گوتى: ئێمه‌ ئاماده‌ين به‌ هۆى ئۆپراسيۆنى (قه‌ڵغانى فورات)ـه‌وه‌، خه‌نجه‌رى خۆمان له‌ دڵى تيرۆر له‌ سووريا بچه‌قێنين.

گوتيشى: ده‌كرێت سنوور و مه‌وداى پرۆسه‌ سه‌ربازييه‌كانمان فراوان بكه‌ين و له‌ داهاتوويه‌كى نزيكدا هه‌نگاوى نوێ و گرنگ له‌ باره‌ى ئه‌و پرسه‌وه‌ ده‌نێين.

ئه‌ردۆغان گوتيشى: توركيا له‌ هه‌موو رووه‌كانه‌وه‌ رووبه‌ڕووى هێرش بووه‌ته‌وه‌. به‌ تايبه‌تى له‌ كاتێكدا هه‌وڵه‌كانى درووستكردنى ده‌وڵه‌تێكى تيرۆريستى له‌ باشوورى سنوورى توركيا هێشتا به‌رده‌وامن.

ئه‌وه‌شى گوت: زۆر لايه‌ن ده‌يانه‌وێت له‌ رێى رێكخستنى پارتى كرێكارانى كوردستانى تيرۆريسته‌وه‌، كه‌ به‌رده‌وام ناوى خۆى ده‌گۆڕێت، گه‌مارۆى توركيا بده‌ن و به‌م نزيكانه‌ زاڵ ده‌بين به‌سه‌ر ئه‌و رێكخستنه‌دا له‌ توركيا و هه‌وڵه‌كانيشمان به‌رده‌وام ده‌بن بۆ راوه‌دوونانيان له‌ سووريا و عێراقدا.

له‌ چه‌ند رۆژى رابردوودا توركيا ئاماژه‌ى بۆ ئه‌وه‌ كردووه‌، ئۆپراسيۆنێكى سه‌ربازى له‌ دژى هێزه‌ كوردييه‌كان له‌ باكوورى سووريا ئه‌نجام ده‌ده‌ن و ناوى لێده‌نێن (شمشێرى فورات).

توركيا له‌ مانگى ئازار/ مارسى رابردوودا رايگه‌ياند، هه‌موو ئامانجه‌كانى له‌شكركێشى قه‌ڵغانى فورات به‌ديهاتوون، كه‌ تايبه‌ت بوو به‌ دابينكردنى ئاسايشى سنوور و ئامانجى ئۆپراسيۆنى شمشێرى فورات راسته‌وخۆ لێدانى گورزه‌ له‌ تيرۆريستان.

  • پۆستکردنی بۆ هاورێیکەت پۆستکردنی بۆ هاورێیکەت
  • چابکردن چابکردن