بەریتانیا: داعش دوای نەمانی بە ناوێكی تر تیرۆر دەست پێ دەكاتەوە

Decrease font Enlarge font قەبارەی فۆنت
image

ڕۆژنامەی "فاینەنشال تایمز"ی بەریتانی لە ڕاپۆرتێكدا بەناونیشانی "كۆتای دەوڵەتی ئیسلامی و مەترسی سەرهەڵدانەوەی گرووپە چەكدارەكان لە ژێر  ناوی تر" بڵاو كردووەتەوە و تێیدا هاتووە، ناوچەكە بەردەوام توندوتیژی بەخۆیەوە دەبینێ و زۆرێك لە چەكدارانی داعش لە نێو خەڵكەوە خۆیان حەشار داوە و مووسڵیان بەجێ هێشتووە، مەترسی زۆرە لە ژێر ناوی تر دەست بە تیرۆر بكەنەوە.

ڕۆژنامەكە نووسیویەتی، چەكدارانی ڕێكخراوی تیرۆریستی داعش لە ساتەكانی كۆتادان و بە هەموو شێوەیەك كۆنتڕۆڵ دەكرێتەوە، هاوكات شاری ڕەقەی بنكەی سەرەكیی تیرۆریستان لە سووریا لە ژێر گەمارۆیەكی چڕدایە، بۆیە ئەو دەوڵەتەی سێ ساڵ پێش ئێستە ڕاگەیەنرایە تەمەنی بەرەو كۆتا دەچێت.

ئاماژەی داوە، زۆرێك لە چەكدارانی داعش ڕیزەكانی ڕێكخراوی تیرۆریستی داعشیان بەجێ هێشتووە و هەڵاتوون و خۆیان لە نێو خەڵك شاردووەتەوە و ئامانجیشیان دووبارە تێكدانەوەی ئارامی ناوچەكە و كردەی توندوتیژییە.

لە بەشێكی تری ڕاپۆرتەكەیدا نووسیویەتی، ڕێكخراوی تیرۆریستی داعش ساڵێك بەر لە ئێستە بەردەوام تووشی شكستی یەك لە دوای یەك دەبێ، بۆیە سەركردە باڵاكانی بۆ پارێزگای دێرزووری دەوڵەمەند بە نەوت لە ڕۆژهەڵاتی سووریا گواستووەتەوە، بە تایبەتیش بۆ شارۆكەی مەیادین و شارەدێی سەحراویە لە سەر سنوورەكانی سووریا و عێراق.

هێما بۆ ئەوەش كراوە كە هەرچەندە مووسڵ ڕزگار كرایەوە، بەڵام هیچ پلانێك بۆ بەڕێوەبردنی شارەكە لە ئارادا نییە، ئەمەش حاڵی تەواوی ناوچەكانی تریشە كە لە دەست تیرۆریستانی داعشەوە ڕزگار كراون و ئێستە هیچ سیستەم و یاسایەكیان تێدا نەماوە، سەرەڕای هەموو ئەوانە توندڕەوی و جیهادییەكان بەردەوام دەبن و هیچ گۆڕانكارییەك لە دۆخەكە ڕوو نادات، بەڵكو ئەوان پچڕ پچڕ كردەی توندوتیژی ئەنجام دەدەن.

  • پۆستکردنی بۆ هاورێیکەت پۆستکردنی بۆ هاورێیکەت
  • چابکردن چابکردن