سه‌رۆك بارزانى بۆ دەرچووانی زانکۆ: بەر بە هەر هه‌وڵێك بگرن كه‌ ده‌یانه‌وێ گه‌لی كوردستان بڕیار نه‌دات

Decrease font Enlarge font قەبارەی فۆنت
image

 (مه‌سعوود بارزانى) سه‌رۆكى هه‌رێمى كوردستان به‌ بۆنه‌ى ده‌رچووانى خولى ریفراندۆم لە زانكۆى سه‌لاحه‌دین، په‌یامێكى پیرۆزبایى ئاراسته‌ى سه‌رۆكایه‌تیى زانكۆ و مامۆستایان و قوتابیانى زانكۆ كرد  كه‌ ئه‌مه‌ ده‌قه‌كه‌یه‌تى:

   به‌ناوی خودای به‌خشنده‌ و میهره‌بان

مامۆستایانی به‌ڕێز
قوتابیانی خۆشه‌ویست
میوان و ئاماده‌بووانی به‌ڕێز

مایه‌ی خۆشحاڵییمه‌ كه‌ ئه‌مڕۆ ژماره‌یه‌كی زۆر له‌ قوتابی و كچ و كوڕانی كوردستان ئاهه‌نگی ده‌رچوونی خۆیان له‌ خولی سی و شه‌شه‌مینی زانكۆی سه‌لاحه‌ددین ده‌گێڕن، به‌وبۆنه‌یه‌وه‌ پیرۆزباییه‌كی گه‌رم له‌ قوتابیه‌ خۆشه‌ویسته‌كان و خانه‌واده‌كانیان ده‌كه‌م و هیوای سه‌ركه‌وتنیان بۆ ده‌خوازم، ئومێد ده‌كه‌م به‌ پسپۆڕی و شاره‌زایی زانستی خۆیان خزمه‌تی وڵاته‌كه‌یان بكه‌ن و له‌ كار و ژیانیشیاندا به‌خته‌وه‌ر و ئاسووده‌ بن.

به‌ پێویستیشی ده‌زانم سوپاسی بێ پایانی خۆم ئاراسته‌ی مامۆستا به‌ڕێزه‌كان و سه‌رۆكی زانكۆ و عه‌مید و سه‌رۆك به‌شه‌كانی كۆلیژ و په‌یمانگه‌ كانی زانكۆی سه‌لاحه‌ددین بكه‌م و ده‌ستخۆشیان لێ ده‌كه‌م كه‌ سه‌ركه‌وتووانه‌ ژماره‌یه‌كی زۆری ڕۆڵه‌ی كوردستانیان پێگه‌یاندووه‌ بۆ خزمه‌تكردنی كۆمه‌ڵگه‌ و پێشكه‌وتنی وڵات.

قوتابیانی خۆشه‌ویست
ئاماده‌بووانی به‌ڕێز

ئێستا گه‌له‌كه‌مان به‌ هه‌ستیارترین چركه‌ساته‌كانی مێژووی خۆیدا تێده‌په‌ڕێ و له‌ قۆناغێكی یه‌كلاییكه‌ره‌وه‌دا ده‌ژیێت، كوردستان له‌سایه‌ی خۆڕاگریی خه‌ڵك و قاره‌مانێتیی پێشمه‌رگه‌ پشت به‌ خودای گه‌وره‌ به‌ره‌و سه‌ربه‌خۆیی هه‌نگاو ده‌نێت، سه‌ربه‌خۆیی گونجاوترین وه‌ڵامه‌ بۆ خوێنی شه‌هیدانمان و موڵكی ئێوه‌یه‌ و موڵكی خه‌ڵك و هه‌موو لایه‌كمانه‌، ئه‌ركی ئێوه‌ی خۆشه‌ویسته‌ كه‌ به‌ قه‌ڵه‌م و زانستتان پشتگیری پڕۆسه‌ی سه‌ربه‌خۆیی بن و ڕووبه‌ڕووی هه‌ر ده‌نگ و هه‌وڵێك ببنه‌وه‌ كه‌ ده‌یانه‌وێ گه‌لی كوردستان بڕیار نه‌دات و به‌ مافه‌كانی نه‌گات.

بۆ ئه‌وه‌ی پسپۆڕی و زانستی مامۆستا و قوتابی و زانكۆكانمان به‌شێوه‌یه‌كی ڕاسته‌قینه‌ بكه‌وێته‌ خزمه‌تی وڵات و پێشكه‌وتنی لێ بكه‌وێته‌وه‌، ده‌بێ كوردستان سه‌روه‌ریی هه‌بێت و خاوه‌ن بڕیاری خۆی بێت و دواجار بتوانێ به‌ باشی سوود له‌ سامانه‌ مرۆیی و سرووشتییه‌كانی وه‌ربگرێت.

گه‌لی كوردستان دوای ئه‌و هه‌موو قوربانیدانه‌ شاییسته‌ی ئه‌وه‌یه‌ وه‌كو میلله‌تانی ئازاد خاوه‌نی سه‌روه‌ریی خۆی بێت و ببێته‌ به‌شێكی گرنگ و كاریگه‌ر له‌ كاروانی مرۆڤایه‌تی و كۆمه‌ڵگه‌ی نێوده‌وڵه‌تی.

له‌ قۆناغی داهاتوودا ئه‌ركی ئێوه‌ی به‌ڕێز و خۆشه‌ویست قورس و بایه‌خداره‌، ئایینده‌ی كوردستان له‌ ده‌ستی ئێوه‌دایه‌ و داواتان لێ ده‌كه‌م به‌ بڕوابه‌خۆبوونه‌وه‌ كار بۆ پێشكه‌وتنی وڵات و به‌هێزتربوونی بكه‌ن، له‌ هه‌مانكاتیشدا فه‌رهه‌نگی پێكه‌وه‌ژیان و دیموكراسی و ئاشتی له‌ كوردستاندا به‌ره‌و پێشه‌وه‌ ببه‌ن، ئێوه‌ ئومێدی هه‌موو لایه‌كمانن و چاومان له‌ هیمه‌ت و ده‌ستی ئێوه‌یه‌.

دووباره‌ پیرۆزبایی له‌ قوتابیانی خۆشه‌ویست ده‌كه‌م و هیوای سه‌ركه‌وتنیان بۆ ده‌خوازم له‌ قۆناغه‌كانی دیكه‌ی ژیانیان.

مه‌سعوود بارزانی

  • پۆستکردنی بۆ هاورێیکەت پۆستکردنی بۆ هاورێیکەت
  • چابکردن چابکردن