ئەحمەد کانى لە کۆبوونەوەیەکى جەماوەریدا:"دەنگدان بۆ سەربەخۆیى کوردستان،ئەرکێکى نەتەوەیى و ئایینیە

Decrease font Enlarge font قەبارەی فۆنت
image

لە کۆبوونەوەیەکى فراوانى جەماوەریدا،بەرپرسى لقى دوو جەخت لەوە دەکاتەوە کە دەنگدان بۆ سەربەخۆیى کوردستان ئەرکێکى نەتەوەیى و نیشتیمانى و ئایینیشە.
بەڕێز ئەحمەد کانى ئەندامى ئەنجوومەنى سەرکردایەتى و بەرپرسى لقى دووى پارتى دیموکراتى کوردستان بە ئامادەبوونى محەمەد خەلیل کارگێڕى لقى دوو و عومەر خڕە بەرپرسى لیژنەى ناوچەى گوڵانى سەر بە لقى دوو،لەگەڵ جەماوەرى سنوورى لیژنەى ناوچەى گوڵان کۆبوەوە.
لەو کۆبوونەوەیەدا بەرپرسى لقى دوو بارودۆخى سیاسى ناوچەکەى شیکردەوە کە ڕووەو گۆڕانکارى گەورە هەنگاو دەنێت و ئاماژەى بەوە کرد کوردستان پشکى گەورەى ئەو گۆڕانکاریانەى بەردەکەوێت دواى گشتپرسیەکەى ڕۆژى 25 ى ئەیلوول کە تێیدا گەلى کوردستان بە بەڵێ دەنگ بە سەربەخۆیى کوردستان دەدات.
هەر لەو کۆبوونەوەیەدا بەرپرسى لقى دوو باسى قارەمانیەتى و قوربانى پێشمەرگەى کوردستانى کرد کە بە درێژایى نزیکەى سێ ساڵ شەڕى مەترسیترین تۆڕى تیرۆریستى جیهانى کرد لەپێناو ئازادى و سەربەخۆییدا و لەو پێناوەدا گیانى خۆیاشیان بەخشى .
لەبارەى بڕیارى خەڵکى کوردستان بۆ ئەنجامدانى گشتپرسى و ڕاگەیاندنى سەربەخۆیى،بەرپرسى لقى دوو باسى پێشێلکاریەکانى دەستوورى کرد بەرامبەر بە گەلى کوردستان لەلایەن بەغداوە،هەر لە بڕینى بودجەو قوتى خەڵکى کوردستان تاوەکو ڕێگرى کردن لە پشتیوانى کردنى هێزى پێشمەرگەى کوردستان لە لایەن وڵاتان بەشێوەیەکى ڕاستەوخۆ،بەرپرسى لقى دوو پێى وابوو کاردانەوەى پێشێلکردنى مافە ڕەواکانى لە دەستووردا واى لە گەلى کوردستان کرد  بڕیار بدا لە 25 ى ئەیلوول کۆتایى بەو شەراکەتە بێنێ کە پێشتر لەسەرى ڕێککەوتبوون لەگەڵ بەغدا.
بەرپرسى لقى دوو داواى کرد هەمووان بە ڕوحیەتى پێشمەرگە بەشدارى پرۆسەى گشتپرسى 25 ى ئەیلوول بکەن و بە بەڵێ دەنگ بۆ سەربەخۆیى کوردستان بدەن،چونکە ئەوە مافى ئەوانە و هیچ هیچ کەس و لایەنێک خاوەنى نییە،بەڵکو خۆیان خاوەنى پرۆسەکەو سەربەخۆیى کوردستانن.

 

  • پۆستکردنی بۆ هاورێیکەت پۆستکردنی بۆ هاورێیکەت
  • چابکردن چابکردن