ئەحمەد کانى خانەوادەى شەهید نەوزاد ڕەجەب بۆتانى بەسەر دەکاتەوە

Decrease font Enlarge font قەبارەی فۆنت
image

لە چوارچێوەى سەردان و بەسەرکردنەوەى خانەوادەى سەربەرزى شەهیدانى کوردستان،بەرپرسى لقى دوو خانەوادەى شەهید نەوزاد ڕەجەب بۆتانى بەسەر کردەوە.
ئێوارەى ئەمڕۆ 20 ى تەمموزى 2017،بەڕێز ئەحمەد کانى ئەندامى ئەنجوومەنى سەرکردایەتى و بەرپرسى لقى دووى پارتى دیموکراتى کوردستان سەردانى خانەوادەى شەهید نەوزاد ڕەجەب بۆتانى لە شارى هەولێر کرد کە لە کردەوە تیرۆریستیەکى ڕۆژى یەکەمى جەژنى قوربانى یەکى شوباتى ساڵى 2004 لەگەڵ پۆلێک لە سەرکردەى قارەمان و کادیرى دڵسۆز و هاوڵاتى سڤیل لە لقى دووى پارتى دیموکراتى کوردستان شەهید بوو، لە لایەن ڕامانى کوڕى شەهید و خانەوادەى شەهید پێشوازیەکى گەرمیان لێکرا.
لەو بەسەر کردنەوەیەدا بەرپرسى لقى دوو لە ژیان و گوزەرانى خانەوادەى شەهیدى پرسیەوەو دووپاتى کردەوە کە خوێنى شەهیدانى کوردستان و قوربانیەکانى پێشمەرگە کوردستانى گەیاندە ڕۆژى سەربەخۆیى و ئازادى یەکجارەکى.
بەرپرسى لقى دوو جەختى لەوە کردەوە کە هەمووان شەهادەت لەپێناوى وڵات بە ئاوات دەخوازن،شەهادەتێک بۆ مێژووى خۆیان و خانەوادەکەیان و میللەتەکەیان جێى شەرەفمەندیە،لەگەڵ ئەوەى هیچ شتێک ناتوانێ قەرەبووى شەهێدێک بۆ خانەوادەکەى و ئەو وڵاتەش بکاتەوە کە ڕۆڵەیەکى بە جەرگ و قارەمانى بەخشى، بەرپرسى لقى دوو گوتى:" بە دەنگدان بۆ سەربەخۆیى کوردستان لە 25 ى ئەیلوولى داهاتوو لە پرۆسەى گشتپرسى،خانەوادەى شەهیدان و گەلى کوردستان بە تێکڕا دەتوانن پارێزگارى لە ناوە مەزنەکەى شەهیدان بکەن و بە هەمووان ڕۆحى ئەوان ئاسوودە بکەن و وەفا بۆ قوربانى و خوێنى ئەوان دووپات بکرێتەوەو بە یەک دەنگ بڵێن بەڵێ بۆ سەربەخۆیى کوردستان.
بەرپرسى لقى دوو ئاماژەى بەو ژمارە کەمەى نوێنەرانى کورد کرد لە بەغدا  کە گەلى کوردستان وەک نوێنەرى خۆیان بەهەڵە هەڵیان بژاردن بۆ ئەوەى داکۆکى لە مافە ڕەواکانیان بکەن ، ئێستا بە وێنەى نەیارانى کوردستان دژى سەربەخۆیى کوردستان دەنگ هەڵدەبڕن و داواى یەکپارچەیى خاکى عێراق دەکەن،ئەو عێراقەى سەرکردایەتى کوردستان هەموو هەوڵێکى سیاسى دا بۆ ئەوەى بە شەراکەت لەو وڵاتە بژین و بەیەکەوە بیبەین بەڕێوە، هەموو هەوڵەکان بێ هودە بوون و ئەوان بوون نەیانویست عێراق بە یەکپارچەیى بمێنێتەوە نەوەک گەلى کوردستان،چونکە ئەوان پێشێلى دەستوور و  مافە ڕەواکانى گەلى کوردستان و تەواوى پێکهاتەو نەتەوە جیاوازەکانیان کرد لە عێراقدا.
ئەحمەد کانى دووپاتى کردەوە کە گەلى کوردستان لەسەر خاکى خۆى سەربەخۆیى ڕادەگەیەنێ و ناچێتە سەر خاکى هیچ کەسێک و داگیرى هیچ وڵاتێک و ناوچەیەک ناکات،بۆیە گەلى کوردستان پێویستى بەوە نییە بگەڕێتەوە بۆ ڕاى هیچ کەس و لایەنێک و وڵاتێک،ئەوە گەلێکى مەزنە بڕیار لە چارەنووس و ئاییندەى خۆى دەدات.

 

  • پۆستکردنی بۆ هاورێیکەت پۆستکردنی بۆ هاورێیکەت
  • چابکردن چابکردن