ئەحمەد کانى بۆ خانەوادەى شەهیدان:"ئێوە پێشەنگى ڕۆژە مێژووییەکەن

Decrease font Enlarge font قەبارەی فۆنت
image

خانەوادەى شەهیدان:"25 ى ئەیلوول جەژنە گەورەکەى ئێمە و گەلى کوردستانە
ڕۆژى 25 ى ئەیلوولى داهاتوو بەلاى خانەوادەى سەربەرزى شەهیدانى کوردستان جەژنە گەورەکەیە،ئەو جەژنەى چەندین ساڵە کورد دەیەوێ سازى بکات، خانەوادەى شەهیدانى شەڕى دژ بە داعش خۆیان بۆ جەژنى پشتیوانى لە ڕیفراندۆمى 25 ى ئەیلوول و سەربەخۆیى کوردستان ئامادە کردووەو پێیان وایە بە دەنگدانیان لەو ڕۆژەدا ڕۆحى شەهیدەکانیان ئاسوودە دەکەن.
بۆ ئاگادار بوون لە ژیان و گوزەران و گوێگرتن لە کێشەو گرفت و داواکانى خانەوادەى شەهیدان،ئەمڕۆ 12 ى حوزەیرانى 2017،ئەحمەد کانى ئەندامى ئەنجوومەنى سەرکردایەتى و بەرپرسى لقى دووى پارتى دیموکراتى کوردستان بە یاوەرى شاندێک کە پێکهاتبوون لە هەریەک د.ئاراس خۆشناو و جەسام موشیر کارگێڕانى لق و ڕێکان سەلام خۆشناو بەرپرسى لیژنەى ناوچەى ئاڵاى سەر بە لقى دوو و مەلا یوسف بەرپرسى بەشى شەهیدانى لقى دوو و بەرپرسى ڕێکخراوەکانى سەر بە لیژنە ناوچە،بەپێى ئەو بەرنامەیەى لە مانگى پیرۆزى ڕەمەزان و بەر لە جەژنى ڕەمەزان داڕێژراوە بۆ لایى لێکردنەوەیان،سەردانى 21 خانەوادەى شەهیدانى سەربەرزى شەڕى دژ بە داعشى سنوورى لقى دووى لە شارى هەولێر کرد.
لەو سەردانەدا بەرپرسى لقى دوو لە ژیان و گوزەرانى خانەوادەى شەهیدەکانى پرسى و جەختی لەوە کردەوە کە بەرهەمى خوێنى شەهیدەکانمان ڕیفراندۆم و سەربەخۆیى کوردستان بوو کە چەندین ساڵە گەلى کورد خەباتى بێ پچڕانى بۆ دەکات،خانەوادەى شەهیدانیش بەڵێنیاندا کە درێژەپێدەرى خەبات و قوربانی دانى شەهیدەکانیان بن و ڕۆژى 25 ى ئەیلوول بیکەنە جەژنێکى گەورەو  بچنە سەر سندوقەکانى دەنگدان و بە بەڵێ دەنگ بۆ سەربەخۆیى کوردستان بدەن.
ئەحمەد کانى ڕۆڵى نیشتیمانپەروەرانەى پێشمەرگە قارەمانەکانى کوردستانى بە پیرۆز وەسفکرد لە پاراستنى خاکى پیرۆزى کوردستان و ئارامى و ئاسایشى هاوڵاتیانى،جەختى لەوە کردەوە کە ئەوان بەخوێنى خۆیان بوونە هۆکارى بەردەوامى و پاراستنى ئەو ئەزموونەى هەرێمى کوردستان کە  زیاتر لە 26 ساڵە کار بۆ بنیاتنانى دەکرێت.
بەرپرسى لقى دوو بە خانەوادەى سەربەرزى شەهیدانى گوت:" بەرهەمى خەبات و تێکۆشان و قوربانیدانى چەند ساڵەى گەلەکەمان بۆ سەربەخۆیى،لە ڕۆژى 25 ى ئەیلوول دەدورینەوە،دڵنیام ئێوە پێشەنگى دوورینەوەى ئەو بەرهەمە مێژووییە مەزنە دەبن.

  • پۆستکردنی بۆ هاورێیکەت پۆستکردنی بۆ هاورێیکەت
  • چابکردن چابکردن